TRATTO DA: Poesie, di Raffaele Viviani, Introduzione di Vittorio Viviani, Napoli, Guida editori, 1981, pp. 43-45.
Chesta è a Rumba d”e scugnizze
ca s’abballa a tutte pizze.
Truove ‘e dame ‘mpizze ‘mpizze
ca te fanno duie carizze.
Si te fa passa’ ‘e verrizze,
strette ‘e mane, vase e frizze,
pruove gusto e te ce avvizze,
cchiù te sfriene e cchiù t’appizze.
Comme a tante pire nizze
te ne scinne a sghizze a sghizze
fino a quanno nun scapizze,
Chesta è ‘a Rumba d”e scugnizze.
‘O rilorgio, mo capisco
pecché ‘o cerco e nun ‘o trovo,
steva appiso, è gghiuto o ffrisco:
c’è rimasto sulo ‘o chiuovo.
‘O chiuovo io tengo…
Cic cic cic cì…
Belle ‘e ‘ammere!
Cic cic cic cì…
Scarola riccia p’ ‘a ‘nzalata.
Cicche cicche cicche cì…
Fenocchie!
Cic cic cic cì…
‘O spassatiempo!
Cic cic cic cì…
Capillo’!
Cic cic cic cì…
Mo t”e ccoglio e mo t”e vvengo!
Cic cic cic cì…
Gue’, l’aglio!
Chesta è ‘a Rumba d”e scugnizze.
Assettateve assettateve!
ca s’abballa a tutte pizze.
‘O quadrillo e ‘a figurella!
Truove ‘e dame ‘mpizze ‘mpizze
‘O mastrillo e ‘a grattacasa!
ca te fanno duie carizze.
Quanto è bell”o battilocchio!
Pruove gusto e te ce avvizze,
Pe chi tene ‘a moglie pazza!
cchiù te sfriene e cchiù t’appizze.
Quatto sorde ‘o finucchietto!
Comme a tante pire nizze
te ne scinne a sghizze a sghizze
fino a quanno nun scapizze,
Chesta è ‘a Rumba d”e scugnizze.
Puparuole e aulive.
Magnateve ‘o cocco! Magnateve ‘o cocco!
Rroba vecchia!
Pallune p”allesse! Pallune p”allesse!
‘E mellune chine ‘e fuoco!
Na bona marenna! Na bona marenna!
Cotogne!
Gelati! Gelati! Gelati! Gelati!
Concia tielle…
‘A pizza cu ‘alice! ‘A pizza cu ‘alice!
Furno ‘e campagna!
‘E lazze p”e scarpe! ‘E lazze p”e scarpe!
D”o ciardino tutte secche!
‘A capa d”o purpo! ‘A capa d”o purpo!
‘O Roma!
Chella bella mamma d”o Carmene v”o ppava!
Nun m”o ppozzo fatica’!
E’ bellella ‘a paparella!
Accatteteve ‘e piatte!
Sei tuvaglie cinche lire!
N’ata pianta p”o salotto!
Nocelline americane!
Tengo ‘o ggrano p”a pastiera!
Pacchiane’, chi s”o penzava?
tiene chisto campo ‘e fave!
Cicchignacco ‘int”a butteglia!
‘O zi’ monaco ‘mbriacone!
‘O veleno p”e scarrafune!
‘A dummeneca addo’ t”a faie?
Comme a tante pire nizze
te ne scinne a sghizze a sghizze
fino a quanno nun scapizze.
Chesta è ‘a Rumba d”e scugnizze.