(da Partitura)
A nuttata è passata… passata,
e stanno ancora durmenno
chille llà ncoppa… ncoppa?
Vulesse sapé comme fanno
cu stu calore… stu calore!
Ma forse hanno rragione lloro… loro
chille llà ncoppa…ncoppa,
è meglio ca se dorme,
quanne se dorme, nun se sente
niente… niente…
Ma nun è o vero ca nun sentettero niente.
Nessuna epidemia, nessuna catastrofe
è silenziosa da queste parti.
Pure allora ci furono echi,
pure tanne ce fuieno strille, lamiente
e richiammate d’ammuina de’ trumbette,
de’ tammorre,
de’ nnàcchere e de scetavajasse,
tutt’e scarrafune inchettero Toledo
Comm’e na folla nera, un’orda;
d’acopp’o Museo, fin’e mmiezo San Ferdinando,
erano tanti, tanti… m’accussì assaie
ca parevano a folla a festa ‘e Piererotta
Piererotta nera, s’intende
Piererotta a lutto…
‘E cane, ‘e gatte, l’aucielle, ‘e pullicine…
se jeveno scavanno lloro stesso
nu pizzo ‘e terra, na ntecchia ‘e frisco
pe murì almeno fora d’a turtura
de ll’acqua e d’a calura, ca po’ eveno a
stessa cosa,
a stessa smaledizione cagnata ‘e mese
ma cu tutto chillo diluvio, cu tutto
chill’arevuoto, uommene e criature,
nun se vedeva ombra ‘e riparo ‘e niente,
proprio a niente…
O mare, po’, notte e ghiurne, c’a luna e
c’o sole,
(ca pur’erano a stessa cosa:
solo un semplice cambio di turno di astri:
comunque incandescenti comunque
infuocati…)
o mare, po’ era zeppo, zeppo pieno di bagnanti,
uommene e animali, animali e uommene
una cosa, s’erano fatti na casa, llà
dinto, mmiezz’all’onne,
mosce-mosce, asciutte, secche:
pareva na tavola ‘e morte, o mare
na pasta crisciuta stesa, senza lièveto,
inerte:
se vedeva ggente a mmare pe tutte parte,
fino ‘e sotto e scoglie ‘e Nisida fino ‘a
Ischia, fino ‘a Surriento,
pe truvà sullievo all’aria, almeno nu
poco pe nun murì proprio comm’è
mmosche o e palomme,
dint’all’arco ‘e na iurnata sola…
“Che belli ferriate ca tene Villanova,
e a Luna nun se move, manco se smove!
Se spanna stu chiarore ncopp’a li
nenne a prora, ca stanno pe fà
ammore, pe fà ammore!”
Comm’e mosche, certo! Comm’e
palomme!
Ma murevano o stesso dint’all’acqua,
o stesso ‘int’a duie iuorne:
se facevano primme russe, poi gialle,
poi viola, e poi finalmente addeventavano
nire-paonazzi, prugne acerbe p’o
friddo, p’a stanchezza. Per l’immobilità.
E nisciuno ‘e puteva purtà a riva
nisciuno ‘e puteva salvà…
nisciuno menava na rezza, nu chiappo
na fune, ncopp’a chella tavola ‘e morte
quell’azzurro obitorio,
mai visto, mai pensato!
Pecché… era sempre stato bello, o
mare, e sano, e innocente!
Chillu mare de’ taralle nfuse e
magnate cantanne
chillu mare de’ spusalizie,
nun ce aveva mai ingannato fino a ieri!
Mai!
E mo’ nun er’ato ca spitale, lazzaretto –
un’immensa cancrena verde chin’e lamiente
e feteva ‘e zolfo, ‘e mercurio. E criolina.
Che sparpetuo! Che sparpetuo!
A l’o vedé. Che sparpetuo! Che sparpetuo!