(da Partitura)
Nu juorno, ‘o Viceré spagnuolo,
dàtese ca mille e mille nave francese,
stevano minacciose dint’o puorto,
pronte a menà ‘nterra tutt’a città,
chiammaie in audienza, a palazzo,
tre Faccetoste, tre Femmene ‘e vita,
tre Bazzeriote napulitante e le dicette:
“Nenné, io saccio ca vuie tenite
stommaco e curaggio,
e, ccà, por Napoles, a situazione
nun è bbona:
‘e Francise vonno trasì, comme vedite,
risolute, n’ata vota,
a se piglià o posto nuosto.
E nuie Spagnuole, è o vero o no?,
v’amme sempe prutiggiute:
nun v’avimme miso nuie fòndaco e bancone?
quanti surdate, llà, v’amme mannate?
quanti denare cu nuie ve site fatte?
Perfino a strada ca se chiama Céuza,
peffino li bbordelle,
perfino o mmale ca v’appèsta e ccarne,
voi la dovete a noi,
a nuie Spagnoledad,
ca tutto ve purtaieme diritto dalle Americhe!
Pirciò, mo, cocche ccosa avit’a fà,
stateme a ssentì:
pigliate na paranza e, sott’e nnave de’ nemici,
de chello ca vuie site, facite bbona canna e bbona lenza,
aroppe (si vuie turnate c’o sì e no c’o non),
a tutte vuie ve damme o Trianòn…”
Y e tre Faccetoste, e tre Femmene ‘e vita,
e tre Bazzeriote napulitane, sentenno sta parola,
se ne iettero ‘e capa, se ne saglietteno ‘e pressione,
e, ‘ntella, subbeto llora iettono sott’e nnave de’ nemici:
e facettono mbriacà, e facettono sfugà,
e, aroppa,
d’a battaglia ca ci afoss’avut’a stà,
nisciuno ‘e chille teneva chiù ggenio ‘e cuntinuà…
N’ata a vota, po’, ‘o Lieutenente de Francise,
dàtese ca mille e mille galiune spagnuole,
stevano minacciuse dint’o puorto,
pronte a menà ‘nterra tutt’a città
chiammaie in audienza, a palazzo,
tre Faccetoste, tre Femmene ‘e vita,
ati tre Bazzeriote napulitante e le dicette:
“Nenné, io saccio ca vuie tenite
stommaco e curaggio,
e, ccà, por Napoles, a situazione
nun è bbona:
‘e Spagnuole vonno trasì, comme vedite,
risolute, n’ata vota,
a se piglià o posto nuosto.
E nuie Francise, è o vero o no?,
v’amme sempe prutiggiute:
nun v’avimme miso nuie fòndaco e bancone?
quanti surdate, llà, v’amme mannate?
quanti denare cu nuie ve site fatte?
Perfino a strada ca se chiama Céuza,
peffino li bbordelle,
perfino o mmale ca v’appèsta e ccarne,
voi la dovete a noi,
a nuie Francise e Spìngule ‘e Lione,
ca tutto ve purtaieme diritto dalle Americhe!
Pirciò, mo, cocche ccosa avit’a fà,
stateme a ssentì:
pigliate na paranza e, sott’e nnave de’ nemici,
de chello ca vuie site, facite bbona canna e bbona lenza,
aroppe (si vuie turnate c’o sì e no c’o non),
a tutte vuie ve damme o Trianòn…”
Y e tre Faccetoste, e tre Femmene ‘e vita,
e tre Bazzeriote napulitane, sentenno sta parola,
se ne iettero ‘e capa, se ne saglietteno ‘e pressione,
e, ‘ntella, subbeto llora iettono sott’e nnave de’ nemici:
e facettono mbriacà, e facettono sfugà,
e, aroppa,
d’a battaglia ca ci afoss’avut’a stà,
nisciuno ‘e chille teneva chiù ggenio ‘e cuntinuà…
Pecché, vedite, tutt’e puttane,
soprattutto chelli napulitane,
so’ fatte proprio accussì:
a lloro nun ce ne fotte niente de denare,
de’ solde, no…
lloro so’ nnammurate sule de’ pparole,
de’ pparole…
‘e chilli sciusce d’aria senza cunsistenza
ca so’ e pparole,
meglio ancora si sonano furastiere…
E accussì:
“Trianòn, Trianòn, ce dann’o Trianòn!
– se dicevano ll’una cull’ata,
ll’una cull’uocchie, c’a speranza ‘e n’ata –
Ce danno nu castiello,
addeventamme nòbbele, marchese, e chi sa c’ato!”
E, mentre faticavano, sta parola
Trianòn, Trianòn…
‘ntrunava ncap’a lloro,
zumpava mpietto a lloro:
s’a vedevano già mmiezz’a mano,
comm’a nu brillante,
na gemma misteriosa, saracena,
n’acqua marina strana, mezz’azzurra e mezza rosa
comm’a luce ca spicchia dint’all’uocchiede de’ ninnille,
mo’ mo’ nate, a ppiett’a mamma…
E, allora, ‘ntella,
tutt’e vvote ca ci a dicevano sta parola,
Trianòn,
tutt’e vvote ca ce a spalummavano
pe nnanzo, sta parola, Trianòn,
subbeto lloro ievano sott’e nnave de’ nemici,
e facevano mbriacà, e facevano sfugà,
‘e, aroppa,
d’ogni battaglia ca ce afoss’avut’a stà,
nisciuno ‘e chille teneva chiù ggenio
‘e continuà…
Embè, o ssapite che d’era stu Trianòn?
Nisciuno ve l’ha maie ditto?
Ato che castiello francese, titolo ‘e nobiltà,
gemma preziosa!
Seh!
Carcere o scuro,
galera,
cancelle,
priggione,
catenaccio,
licchetto, chest’era, chesto!
Carcere o scuro, sempre!
E quando maie simme state o llustro, nuie?
E quando maie simme state cazze
‘e ce allumma?!
Ma, a chilli tiempe, era pure peggio ‘e mo’;
a chilli tiempe, in ringraziamento dei nostri servigi,
ci facevano accomodare nel fresco
budello di un vicolo,
‘o quartiere a Vicaria,
dint’a na saittella ventilata,
che, soprattutto nei mesi estivi,
i Signori Potenti, così bene serviti,
Spagnuole, Francise, Austrièce,
Savoiardi, Borboni,
graziosamente donavano,
come villeggiatura,
alle sciagurate sfoga-chiorme di turno:
dopo avergli impresso sul petto
nu tatuaggio a forma ‘ e stella,
a fforma ‘e stella rossa a otto punte,
e ogni punta diceva na lettera:
m-e-r-e-t-r-i-x-
m-e-r-e-t-r-i-x-
e po’ se ne ievano,
cu nu piezzo d’inchino, si ve pare,
cu ne piezzo ‘e sciamanfù, si ve piace
ma chesto, chest’era, chesto rimmaneva
a lloro, ‘e vaiasselle:
carcere o scuro, carcere o scuro, sempre,
per la cui porticina, piccerella, piccerella,
manco se puteva passà,
senza la preventiva e rustica rovistazione
alle loro parti intime, “molto” intime,
e si ce steva in giro qualche ennesima quadriglia
de riènnele, perucchie e fetenzie, assorbite,
le cumbinavano pure, pe rrialo, nu bellu
taglio di capelli alla Giovanna d’Arco!
“E benvenute! – cantava lu guardiano a ll’e
vvedè – benvenute !!!
Padre, n’atu frate, brodo lungo e seguitate!”
Ma comme se fà cu a munnezza, neh?,
comme se fà?
Comme s’è fatto sempre:
primma s’ausa e aroppe se n’abbusa…!”
E ogne notte, dint’e celle, passava na vecchia,
na vecchia pazza, cu na sporta e na lancella,
dev’acqua, pane e doie parole amare,
e po’ ieva alluccanno
per tutt’e pporte,
pe tutt’e mmura,
pe tutt’e viche stritte ‘e stu sburiello:
“Si tiene figlie mascule – diceva – nun chiammà mariuole,
e si tiene figlie femmene, nun chiammà puttane…
si tiene figlie mascule nun chiammà mariuole,
e si tiene figlie femmene, nun chiammà puttane…
si tiene figlie mascule nun chiammà mariuole,
e si tiene figlie femmene, nun chiammà puttane…